Lehenik, EH Bilduk txalotu egin nahi du pentsionisten duintasunaren aldeko borroka, gizarte zibil aktiboa baita etorkizun askerako motorra. Gainera, eta pentsiodunek aldarrikatzen duten moduan, ez dira beraien pentsioen alde bakarrik borrokan ari, gaur egun lanean ari diren etorkizuneko pentsionisten alde baizik.
Sarri adierazi dugun moduan, EH Bilduk herritar librez osaturiko herri libre bat du helburu eta horretarako ezinbestekoak dira herritarren oinarrizko eskubideak bermatuak egotea. Ongizate sistema baten oinarri oinarrian, pentsioak, osasuna eta hezkuntza daude; ondorioz, pentsio sistema publiko eta duinen aldeko borrokan beti izango da EH Bildu.
Pentsio sistemaren deuseztapen prozesua, sistema ekonomikoak gizartearen prekarizazio orokorra gauzatzeko pauso bat gehiago eta horretarako ezinbestekoa da, egungo lan merkatuaren prekarizazioa ere. Hori dela eta, EH Bilduk bat egiten du ez soilik, pentsio sistema duinaren aldarrikapenekin, baita gutxieneko soldata 1.200 eurokoa izan, lan merkatuaren erreforma bertan behera utzi, eta 1.080 euroko gutxieneko pentsioak Eusko Jaurlaritza zein Nafarroako Gobernuak konpentsatzearekin ere.
EH Bilduk argi du, burujabetzak herritarren bizi baldintzak hobetzea ekarriko duela, Madrilgo gobernuak ezarritako sistema eta erabakiak ez baitira gure beharretara egokitzen.
Hori guztia dela eta, EH Bilduk herritarrei dei egin nahi die larunbatean, Tolosako kaleetan burutuko den manifestazioan parte hartzera.