Herri galdeketa: Parte hartu eta bozkatu!

Erabiltzailearen aurpegia EH BILDU Amasa Villabona 2021ko aza. 18a, 14:27

Amasa-Villabonako Udalak, gure herrian inoiz egin den parte hartze ariketa sakonena garatu du eta orain herritarren eskuetan dago erabakia. EH Bilduk gidatzen duen udal gobernua, gobernantza eredu garden eta parte hartzaile bat eraikitzen ari da Udalean, demokrazian sakonduz eta herritarrak ahaldunduz.
Orain herritarron garaia da, parte hartu eta erabaki dezagun!

Udalak apirilean hasitako parte hartze prozesua eredugarria izaten ari da; Udaleko Herritarren Parte Hartze Batzorde berezian adostasunez eta gardentasun osoz hartu dira erabakiak, hautagai dauden proiektu guztiak herritarrek edota herriko elkarte zein eragileek proposatutakoak dira, herritarrei informazio argia helarazi zaie etab.

Ez dago zalantzarik, honakoa mugarri garrantzitsua izango dela eta eragina izango duela aurrerantzean Amasa-Villabonan garatuko diren Udal politiketan. Hemendik aurrera herritarren partaidetza ezinbestekoa izan beharko litzateke herriari eragiten dien erabaki garrantzitsuetan eta aldebakartasunak zein inposizioek ez lukete lekurik izan behar.

EH Bildun oso argi dugu gure herrian kalitatezko demokrazia bat eraikitzeko, Udal politika egiteko eredu zaharkituak eta iraganeko inertziak gainditu behar ditugula. Guretzat ez da nahikoa herritarrek soilik 4 urtetik behin bozkatzeko aukera izatea eta ondoren legealdian zehar erabaki guztiak politikariek soilik hartzea. 

Ondorioz, une esanguratsu batean gaude eta herritarron parte hartze zabala lortzea oso garrantzitsua izango da. Herritarrok erakutsi eta demostratu behar dugu, gure herriak eta bere etorkizunak kezkatzen gaituela, interesa dugula herria hobetzeko, ez dugula guztiaz paso egiten eta erabakia gure eskuetan jartzen denean, parte hartu eta bozkatzeko prest gaudela.

Beraz, Amasa-Villabonako EH BILDUtik datorren azaroaren 19tik 28ra garatuko den Herri Galdeketan parte hartzeko deia egiten dugu.
Berdin du telematikoki edo modu tradizionalean, baina eman zure bozka!



AMASA-VILLABONAKO EUSKAL HERRIA BILDU



Ez diogu hau kapritxo hutsagatik: lagun gaitzazu . Eduki hau guztia doan ikus dezakezu euskarazko hitzik gabeko Tolosaldea ez dugulako irudikatzen. Atarikide, iragarle eta erakunde askoren laguntzarik gabe ez litzateke posible hori. Gero eta komunitate handiagoa sortu, orduan eta sendoagoa izango da Ataria: zurekin, zuekin. Ez utzi biharko gaur egin dezakezun hori: egin zaitez Atarikide!


EGIN ATARIKIDE!