Hauxe da gaur goizean EH Bilduko udal taldeak Villabonako udalean modu ofizialean erregistratu duen eskaera orriak dioena:
"Villabonako udaleko alkateari:
Gaur (2016-09-01) Tolosaldeko Atariaren webgunean (ataria.info) hondakinen bilketa sistemaren aldaketari buruzko albistea irakurri ahal izan dugu. Bertan aldaketaren datak ere argitaratu direlarik.
Hilabeteak dira EH Bilduko zinegotziok gai honi buruzko inolako informaziorik jasotzen ez dugula. Udal honetan EAJ, PSE eta EH Bildu alderdien arteko akordioa sinatu genuenean, hondakinen sistema aldaketaren gaiaren jarraipena egin, eta emango diren urratsak eztabaidatu eta elkarrekin adosteko foroa, Ingurumen batzordea izango zela adostu genuen. Foro honetan, sistema aldaketa modu adostuan eta elkarlanean egiteko konpromisoa hartu zuen gurekin Iban Agirre EAJko alkate ohiak.
Hori horrela izan arren, hilabeteak pasa dira Ingurumen batzordea bildu zen azken egunetik.
Beraz, Amasa Villabonako EH Bilduko udal taldetik, honako eskaera egiten dizugu:
Ingurumen Batzordea berehala biltzea. Batzorde honetan hondakinen bilketa sistemaren aldaketaren gaia monografikoki lantzea eta udal gobernuak datozen asteetan gai honetan emango diren urratsei buruzko xehetasun eta informazio guztia bidali edo helaraztea udal honetako alderdi politiko guztiei.
Agur bero bat."
Eskaera mezu hau bera, zuzenean Maite Izagirre alkateari eta bere idazkari pertsonalari bidali zaie e-posta bidez.
Amasa Villabonako EH Bildutik, udal gobernuak eskaera honi modu positiboan erantzutea espero dugu eta Ingurumen Batzordean gai honi buruzko xehetasunak modu eraikitzailean landu, adostasunak lortu eta elkarlanean aritzeko borondate guztia dugula adierazi nahi dugu. Era berean, oso argi dugu Amasa Villabonan orain arte lortutako birziklatze tasak mantendu edo igotzea izan behar dugula helburutzat, eta udalean sinatutako akordioan jasotzen den bezala, ez dugu inolaz ere birziklatze tasa %70etik jastea onartuko.