Tolosako ospitale publiko berria ez da edozein proiektu: herriaren eta eskualde osoaren etorkizunerako azpiegitura estrategikoa da. Urteetako aldarrikapenen ondoren, helmuga argia da: 2032rako ospitale publikoa martxan egotea. Baina horretarako, ezinbestekoa da gaur eman beharreko urratsak lehenbailehen ematea.
Duela hamar hilabete eskatu genion idatziz EH Bilduko Udal Gobernuari etorkizuneko ospitalea hartuko duen lurzoruaren jabetza osoa eskuratzeko prozesua abiaraztea. Denbora tarte nahikoa izan da lanean hasteko. Gure harridurarako eta kezkarako, udalak oraindik ez ditu beharrezko urratsak eman lurzati osoa eskuratzeko. Are gehiago, azken hilabeteetan desjabetzea aipatu bada ere, ez dago prozesuaren egoerari buruzko azalpen argirik, ezta egutegi zehatzik ere. Zergatik ari da hainbeste luzatzen ospitalearen etorkizunerako giltzarri den tramite hau? Zer ari da huts egiten? Eta zergatik ez da Tolosako Udala lehentasunezko gai moduan kudeatzen ari gai hau?
Gogorarazi nahi dugu lurzati urbanistikoa osotasunean udalaren esku egon ezean ezin dela lurra Eusko Jaurlaritzako Osasun Sailari laga. Eta lagapen hori egin ezean, ospitale berria eraikitzea ezinezkoa dela.
Horregatik, Udal Gobernuari gardentasuna eta premiazko jarduna eskatzen dizkiogu. Herritarrek jakin behar dute:
- Zein egoeratan dagoen oraindik eskuratu gabe dauden bi partzelatxoen erosketa edo desjabetze prozesua.
- Noiz aurreikusten duen udalak lurzati osoaren jabetza eskuratzea.
- Eta noiz sinatzeko moduan egongo den Eusko Jaurlaritzako Osasun Sailarekin lagapenaren hitzarmen urbanistikoa.
Ospitale publiko berria lehentasun bat bada EH Bildurentzat, gaiak lehentasunezko trataera behar eta merezi du Tolosako Udalean.