Tolosako haurrek Bonberenea Txarangako kide izan nahi dute handitzen direnean. Helduek, berriz, haurren aitzakian gozatzen dute taldearen emanaldi bakoitza (edo aitzakiarik gabe ere bai).
Jende artean eta kaleko zalapartan entzutera ohituak gaudena oholtzara pasatzean, iritzi eta erreakzio zenbait aldatu egiten dira, baina Bihar ez da gaur diskoak eskatu egiten du tranpaldoari begira egoteko aulki bat.
Larunbatean, aulkiak erretiratu behar izan zituzten Plaza Zaharretik, gure herri honek duen eguraldi zoroak hala behartuta. Aterki lotsatiak pixkana hurbildu ziren, ordea, ezezagun samarra zaigun testuinguru bati begiratzeko. Plazak bazuen xarma, eta baita argiek ere. Bonberenea Txarangak lehen hiru piezak eskaini eta lehen iruzkinak entzun ziren, ordea, jendartean: "A ze soinua duen!".
Eta soinuaren indarraz, euria atertzen joan zen heinean berotu zen publikoa. Abesti abstraktu edo teknikoenekin ere dantza eginez. Finean, musika bere bizitzan ezinbesteko duen edonork gozatzeko moduko emanaldia izan zen eta, Natalia Garmendiak abestu zuen bezala, etengabe karrika jolasean, dena posible zen garaietara itzuli ziren ikusi-entzuleak.
Testua: Itzea Urkizu
Argazkiak: Josetxo Perez (Bonberenea)