Pasa den asteburuan Belabieta Kirol Klubeko gimnastek hainbat txapelketetan parte hartu zuten. Larunbatean, maiatzak 18an, Belabietako oinarrizko taldeko gimnastek Santanderren egindako Espainiako Kopan parte hartu zuten, 16. postua lortuz. Denboraldiko txapelketa garrantzitsuenetako bat dela kontuan hartuta, oso lan ona egin zuten, 51 talde atzean utziz.
Igandean, berriz, Itzal torneoan infantil Anoeta eta Zubimusu taldeek, jubenil eta senior B taldeek eta Maialen Azpirozek parte hartu zuten. Zubimusu infantil taldeak zilarrezko domina lortu zuen eta infantil Anoeta taldeak brontzezkoa. Maialen Azpirozek, kadete B mailan, 4. postua lortu zuen. Senior B taldeak ere podiuma egin zuen 3. postua lortuz eta jubenil B taldeak 5. postua lortu zuen.
Hurrengo txapelketa maiatzaren 26an izango da, Durangoko Landako kiroldegian egingo den Jubenil eta Senior Amateur Euskadiko Txapelketa hain zuzen ere. Bertan Belabietako senior eta jubenil taldeek eta jubenil B mailan Irati Larretak eta Uxue Ugartemendiak hartuko dute parte.
Azkenik, larunbatean Andoaingo Oskarbi klubaren jaialdira gonbidatu gaituzte, eta bertan Belabietako oinarrizko jubenil taldeak eta Mireia Larretak parte hartuko dute.
Ez diogu hau kapritxo hutsagatik: lagundu iezaguzu. Eduki hau guztia doan ikusten duzu ez dugulako irudikatzen euskarazko hitzik gabeko Tolosalderik. Atarikide, iragarle eta erakunde askoren laguntzarik gabe ezinezkoa litzateke. Zenbat eta komunitate handiagoa sortu, orduan eta sendoagoa izango da ATARIA: zurekin, zuekin. Ez utzi biharko gaur egin dezakezuna: egin zaitez Atarikide!
