Neguko hotzari aurre egiteko eta Gabonak herri giroan ospatzeko asmoz, iaz bezala, talo ekologikoak eta garagardo artisauak eskainiko dituzte Beertokiko gazteek. Zita datorren abenduaren 28an izango da Villabonako Berdura plazan. Familia guztiarentzat antolatutako Gabonetako plan alternatibo hau tradizio berri bat bilakatzeko bidean doa. Gainera, aurten, berrikuntza modura gaztaina erreak ere eskainiko dira.
Alkizako Julen Altzelai Agerre talogilea da EkoTaloak proiektuaren sortzailea. Agerre eta bere kideek, arto-irin ekologikoa erabiltzen dute taloak egiteko eta hau betetzen duten produktuak ere bertakoak eta ekologikoak izaten dira. Zapore ezberdinetako taloak egiten dituzte. Iaz, bakailao, onddo nahaskia edota talo beganoa izan genituen aukeran, betiko txistorra, hirugiharra, gazta eta txokolateaz gain. Eta noski, aurten ere talo bereziak dastatu ahal izango ditugu.
Gaztaina eta taloez gain, Beertokik antolatzen dituen ekimen guztietan bezala, Euskal herriko garagardo artisaua egongo da. Beraz ez izan zalantzarik eta gerturatu Berdura plazara hilaren 28an, familia edo lagunekin urtea ongi amaitu eta arratsalde polit bat pasatzera.