1976ko otsailak 26an atera zen Espainiako azken militarra Mendebaldeko Saharatik, 53. probintzia izendatua zuen lurraldetik, jarraian Fronte Polisarioak SEAD (Sahara Errepublika Arabiar Demokratikoa) aldarrikatu zuen, Saharari lurraldetasuna aitortuz. Espainiak ez zuen zegokion deskolonizazio prozesua ondo egin eta Marokoren eskuetan utzi zuen lurraldea. Orduz gero, erresistentzia, aldarrikapenak eta nazioarteko legedia betearazteko eskaeren zurrunbiloan bizi dira sahararrak.
Egoera hau salatzeko elkarretaratzea egingo dute gaur, Tolosako Trianguloan, 18:30ean. Tolosaldea Sahararekin elkarteak deitu du Maroko mendebaldeko Saharatik at lelopean. Deialdi horrekin batera eskualdeko udaletxe bat baino gehiagotan Saharako banderak zintzilikatuko dituzte gaurko eguna gogoratzeko. Tolosaldea Sahararekin elkarteko kideek honelako ekintzak sahararrentzat «elkartasun eta besarkada keinuak» direla adierazi dute.
Adnan Dahi Gipuzkoako Sahararren Elkarteko lehendakaria da eta gaurkoa saharar guztientzat oso egun «esanguratsua» dela azaldu du, «estatuaren onarpenak gatazkari amaiera emango dio» gaineratuz. Gehiegi luzatu da gatazka, mende erdi, eta ordainetan okupazioa, erbestea, diaspora, gerra, torturak, biolentzia eta gatazka konpontzeko borondate eza jaso dituzte sahararrek. «Marokok sekula ez du gatazka onartu eta 2020ko azaroan su etena puskatu zuenetik gerra egoeran gaude, zibilak hil dira, higadura gerra bat da», azaldu du Dahik. «Azken gerra hau ere ez du onartzen Marokok, isiltasun mediatiko osoa du gatazka honek». Saharako lurra eta itsasoa aberatsak dira, fosfatoa eta arrantzagatik bereziki. Irmo azaldu du Dahik, «Marokok ustiatzen ditu gure fosfato meategiak eta gure uretan Espainiako zein atzerriko arrantza ontziek arrantza egiten dute, guri dagokigu ustiaketa honen ardura». Marokok autonomia eskaini zion Saharari, baina Fronte Polisarioak nazioarteko legedia betetzea eskatzen du, erreferenduma egitea, alegia.