Martxel Larraza eta Joseba Olagarai kazetariek Xerka hitzaldia emango dute Iruran, datorren asteazkenean, 18:00etan, udaletxeko ganbaran. Eurekin batera, Matxalen Mendizabal herritarrak bere lekukotza emango du. Solasaldiaren ondoren, hurrengo asteko ostegunera arte, argazki-erakusketa ikusgai egongo da herri eskolako aretoan.
Hitzaldian, hainbat lurralde, jatorri eta adinetako bost pertsona disidenteren nortasunak eta bizi-esperientziak ezagutaraziko dituzte. Ekimenak, hain zuzen, helburu du mezu positibo bat transmititzea: euskal landa-eremuan posible dela queer izatea eta herrian bizitzea, euskaraz. Izan ere, sexilioa deitzen zaio sexu-orientazioa edo genero identitatea dela eta jasandako zapalkuntzarengatik euren familia eta gizarte ingurunetik hiriguneetara ihes egiten duten LGTBIQ+ pertsonen migrazio behartuari.
Xerka Martxel Larrazak 2023an ondutako foto-kazetaritza proiektua da, urtebete beranduago komunikazioko GRALen III. Berria sariketan saritu zutena. Paisaiaren eta erretratuaren genero klasikoak uztartuz eta hainbat teknika eta estilo fotografiko baliatuz, subjektuaren eta haren ingurunearen arteko dialektika poetikoa proposatzen dute argazkiek, gatazkatsua bezain harmoniatsua izan daitekeen harremanaren inguruan.
