Otsailaren 23an hasiko dituzte Irurako plaza oinezkoentzako espazio bihurtzeko lanak. Obrak zazpi hilabeteko iraupena izango du aurreikuspenen arabera. Bitarte horretan sortuko diren eragozpenengatik, «pazientzia eta ulermena» eskatu die udalak herritarrei.
Hilabeteotan, plazan sartzeko baimena bertako bizilagunek bakarrik izango dute. Gainera, hegoaldeko sarrera erabat itxita egongo da, eta bizilagunek elizaren atzetik pasatzen den errepidea erabili beharko dute. Obrako edukiontziak hilerri bideko aparkalekuan jarriko dituzte. Udalak oinezkoentzako pasabideak errespetatzeko eskatu du, «denen segurtasuna bermatzeko».
Udaletxearen atzean dagoen autobus geltokia Kale Nagusiko 25. zenbaki ingurura lekualdatuko dute, eta hondakinentzako edukiontziak gaur egun autobus geltokia dagoen tokian kokatuko dituzte.
Obraren lehen zatia udaletxearen atzealdean hasiko da, eta lanek aurrera egin ahala beharrezko oharrak zabalduko dituela jakinarazi du udalak.
Proiektuaren helburua Irurako plaza oinezkoentzat gune seguru eta irisgarri bihurtzea da. Behin lanak amaituta, ibilgailu motordunek ezingo dute bertan aparkatu. Udalaren esanetan, obrak herritarren bizi kalitatea hobetuko du. Plaza egokitzeko 781.000 euroko inbertsioa egingo dute, eta Campezo enpresa arduratuko da lanak egiteaz.