Eguerdian jokatu dituzte Irurako VI. Frontenis Txapelketako finalak, herriko frontoian. Irurako Gazte Asanbladak antolatzen du txapelketa, eta aurten, bi maila izan dira: herrikoia eta lehiakorra. Txapelketa herrikoian, Iñigo Garagarzak eta Idoia Garaialdek osatutako bikotea izan da garailea. 30-17 irabazi die Matxalen Mendizabalek eta Lander Huartek osatutako bikoteari. Lehen zatiaren erdialderako markagailuan alde handia lortu dute txapeldunek, eta bigarren zatian alde horri eutsi diote.
Txapelketa lehiakorreko finala parekatuagoa izan da. Bikoteetako bat Beñat Nogalesek eta Julen Apeztegiak osatu dute; Apeztegiak Iurgi Artola ordezkatu du. Beste bikotea, berriz, Asier Mujikak eta Unax Apeztegiak osatutakoa izan da. Berdinketa ugari izan dira markagailuan, eta tanto nekagarri asko jokatu dituzte. Azken tantoetan, nabaritu da horren eragina aspektu fisikoan. Amaieran, 30-24 irabazi dute Mujikak eta Unax Apeztegiak.