Emakume artisauen azoka lekualdatu dute goizean. Hasiera batean plazan egitea aurreikusten zuten Irura Moretuz talde feministako kideek, baina eguraldi txarra dela eta, pilotalekuan antolatu dute. Laugarren edizioa izan dute aurtengoan, eta aurrekoetan bezala, herriko zein inguruko emakume artisauen lanei ikusgarritasuna eman eta aitortza egiteko helburuarekin ospatu dute. Denetariko 30 postu izan dira guztira pilotalekuaren bueltan, eta bertaratu diren herritarrek horietan zeuden produktuak ikusi, dastatu eta erosteko aukera izan dute. Mokadu bat hartzeko aukera ere izan da, Anoetako talogileen eskutik.