Hamarnaka gazte bildu dira gaur eguerdian Irurako plazan, baserritar jantziekin eta zapi berdea lepoan zintzilik zutela. Asteotan entseatutako dantza jendaurrean dantzatzeko unea iritsi zaie askori, lehenengoz. Izan ere, 13:00etan hasita, ordu erdi luzeko iraupena izan du gaurko soka-dantzak.
Dantzari batzuk serioago, besteak festazaleago; batzuk urduriago, beste batzuk lasaiago, baina guztiek une polita eskaini nahi izan diete San Migel plazan bilduriko ikusleei. Une hunkigarriak ere bizi izan dira, gazteek etxeko kuttunak dantzara atera dituztenean, omenaldia eskaintzeko.
Edonola ere, atseden hartzeko denbora gutxi izango dute Irurako gazteek, izan ere, asteburu guztian zehar izango da zer ospatua San Migel jaien barruan.
EGITARAUA
- GAUR, LARUNBATA.
- 09:00. Gazte festaren hasiera San Migel plazatik.
- 11:00-13:00 eta 15:30-18:30. Haur parkea ikastolako patioan.
- 13:00. Dantza soka plazan.
- 14:00. Haurren bazkaria elizako arkupetan.
- Bazkalostean. Jolasak haurrentzat adinaren araberako taldeetan.
- 14:30. Gazteen bazkaria Gazte Alaiak elkartean.
- 18:30. Poteo musikatua Burrunba elektro-txarangarekin.
- 20:00-22:00. Beldur barik gunea San Migel plazan.
- 23:30. Janus Lester eta Iratzar taldeen emanaldia.
- 00:30-03:30. Puntu morea: Emakumeak elkarrekin etxera itzultzeko udaletxearen aurrean.
- BIHAR, IGANDEA.
- 11:00. Patata-tortilla lehiaketak helduentzat eta haurrentzat San Migel plazan.
- 12:00. Sagardo dastatzea San Migel plazan.
- 18:00. Onintza abesbatzaren emanaldia elizako arkupetan.
- 19:00. Txapela Brava taldearen emanaldia.
- 20:00-22:00. Holi festa DBHko nerabeentzat gazteen karpan.
