Gustura zegoen eta baita hunkituta ere Jon Gurrutxaga eta berarentzako festei hasiera ematea «ohorea» dela esan du. DJ Bull izenarekin bere bidea hasi zuela 25 urte bete dira, eta Irurako jai batzordeak bera izendatu du herriko festei hasiera emateko. Musika erabili du bere mezua girotzeko, eta jai batzordeari eskerrak eman ondoren, lehenbizi palestinarrak izan ditu gogoan. Jarrain, Irura Moretuz taldeak egiten duen lana eskertu du; «erasorik gabeko jai gunea nahi dugu, ez matxistarik, ez homofoborik ez arrazistarik», esan du. Euskara ere izan du hizpide, eta gogora ekarri du datorren urtean Korrika ospatuko dela. Dantzarako gonbita egin ondoren, berarekin balkoian zeuden herriko eragileak izan ditu gogoan, eta ondoren suziria piztu du.
Behin festari hasiera eman ondoren, Gorka Murua alkateak festetako zapia jarri dio Gurrutxagari, eta herensugeak bere bidea hasi du elizako dorretik udaletxeraino. Loatzo musika eskolako txarangak girotu du plaza, eta ondoren etorri da puxikak eta goxokiak botatzeko unea, haurren gozamenerako. Azkenik, erraldoiek dantza bat egin dute plazan, eta buruhandiek eta txarangak lagunduta, kalejirarekin hasi dira.