2013tik Irurako Babes Zibileko taldean ibili den taldeak dimisioa aurkeztu berri du. Kideek 60 urte inguru dituzte eta adierazi dutenez larrialdi egoera bati erantzuteko beharrezkoa diren ahalmenak ez dizkietela ikusten euren buruari, behin adin horretara iritsita. Udalak Irurako Babes Zibileko taldea eraberritzeko deialdi irekia egingo du aurrerago.
Dozena bat urtetan lanean aritu dira Jose De Dios Cordobes, Antxon Gutierrez Galvez, Xabier Karrera Jauregi, Jokin Lasa Salaberria, Ascensio Iturbe Iradi, Mikel Mendizabal Zabaleta eta Joxi Lasa Arsuaga. Boluntario gisa ibili dira herriko babesa nahiz segurtasuna bermatzeko. Besteak beste, taldeak okasio hauetan eskaini du zerbitzua: Eguberrietako kalejiretan –Olentzero eta Erregeak–; kirol probetan –Herri krosa, patinaje lasterketa, T3T mendi lasterketa, txirrindulari probak–; Loatzo musika eskolaren ekitaldietan –Kaldereroak, Xixili eguna–; eta San Migel jaietan –herrian izaten diren kalejiretan–. Gainera, COVID-19 garaian, Eusko Legebiltzarrerako hauteskunde eguna prestatzen ere lagundu zuten.
Irurako Udalak eskertu du urteotan Babes Zibileko kideek, eta bereziki, Joxi Lasa arduradunak egin duten lana.
Joxi Lasa Babes Zibileko arduraduna 2017an, festetako txupinazoa bota bezperatan.