Irura Moretuz talde feministak lodifobiari aurre egiteko tailerra antolatu du, apirilaren 9an, asteazkenarekin udaletxeko ganbaran, 17:30etik 20:00etara. Gorpuztutako indarkeria lodifoboei aurre egiteko estrategiak lantzeko tailerra izango da eta Leire B. Murguialday psikologoak emango du. Doakoa izango da tailerra baina martxoaren 28a baino lehen eman beharko da izena.
Irurako talde feministatik aipatu dutenez, «gorputzen aurkako indarkeria-eredua ulertzen eta identifikatzen lagunduko digu, lodifobiak gure osasunean eta ongizatean duen eragina aztertuz». Bi orduko saio parte hartzailea izango da, norbere bizipenak partekatzeko espazio segurua sortuko dute, hitza eta gorputza ardatz hartuta.
Emuna Aüka Koop. Elk. Txikiko zuzendaria da Murguialday eta arteterapiaren baliabideak erabiliz, kolektiboki erresistentzia-estrategiak garatuko ditu, lodifobiari modu indibidualean zein kolektiboan aurre egiteko tresnak eskuratzeko.
Elkar zaindu eta indartzeko gune horretan parte hartzeko gonbita luzatu dute Irura Moretuz taldetik. 15 pertsonak parte hartu ahal izango dute, eta gehiagok izena ematen badute zozketa egin beharko dute. Martxoaren 28a da izena emateko azken eguna.