John Cabang atleta irurarrari omenaldia egin diote gaur herrian bere kirol ibilbidean erakusten ari den mailagatik eta Iruraren izena munduan zabaltzen laguntzeagatik. Udaletxeko ganbaran egin diote harrera instituzionala eta Irurako Udalak, Gipuzkoako Atletismo Federazioak eta Cabangen lagunek hartu dute parte. Herriko eragileen esker ona jaso du, ondoren, plazan.
Atleta gaztea «pozik» agertu da orain arte lortutakoagatik, eta aitortu du iritsi den tokira iritsi bada ingurukoen bultzadagatik izan dela. Udalaren izenean hitz egin du Gorka Murua alkateak eta kirolari gaztea zoriondu du orain arteko lorpenengatik. Udalak hariz egindako koadro bat eman dio oparitan.
Ramon Goikoetxea Gipuzkoako Atletismo Federazioko presidenteak arreta jarri du kirolari olinpiko izatera iristeko egin behar den lan guztian eta Cabangi esker ona adierazi dio «zailtasun guztiei aurre egiten jakiteagatik». Oroigarri gisa urrezko ezkur bat ere eman dio oparitan.
Cabangen ibilbidea laburbiltzen duen ikus-entzunezko bat eskaini dute ekitaldi instituzionala amaitzeko; lagunek prestatutako bideoa izan da eta haiek hartu dute hitza segidan, prestatu dituzten bertsoak kantatzeko. Plazan jarraitu du ekitaldiak eta agurra dantzatu diote kirolari gazteari; segidan, Irura Bizi eta Irurako Ikastolakoen opariak jaso ditu. Goizeko ekitaldia, bere argazkiak sinatzen amaitu du.
