Txapeldunak ez dira gustura geratu bere partidarekin, baina partidaren amaiera nahiko erosoa izan dute. Halsouetek lau final jokatu eta lau txapel lortu ditu Iruran, eta gustura azaldu da Mujikarekin lortu duelako aurtengoa. Mujikak gustura jantzi du bere lehenengoa, eta «bazela garaia» azaldu du. Hasieran ez da ondo sartu partidan, akats batzuk eginez, baina atsedena hartu eta hortik aurrera hobeto sentitu da.
Gaztetxoen I. San Migel Xare Ireki Mistoari dagokionez, Adei Gibelalde eta Paule Fernandez bikoak 35-23 irabazi die Sara Agirre eta Izei Garmendia bikoari. Txapeldunek ondo bideratu dute partida, pilota gutxi galduz.
Ametsa Pilota Elkarteko Mikel Uzkudunek balantze ona egin du txapelketen inguruan: «Hasieratik ondo joan da, partida lehiatuak ikusi ditugu, eta balantze ona egiteko moduan gaude. Finalak ez dira izan espero bezain lehiatuak, baina ikusi dugu bi txapelketetan nolako maila duten pilotariek». Finalak Irurako San Migel jaien barruan jokatu dira, Ametsa trinketean.
