Eguraldi onarekin batera hasten dira udaberriko azokak, baina gaur laino artean egin behar izan dute Iruran. Hain zuzen, artisautza eta janari azoka ospatu dute, hamaikagarrenez. Honela, artisau eta nekazariek ekoitzitako hainbat produktu erosteko aukera izan da plazaren bueltan.
Guztira, 20 postu baino gehiago izan dira, herriko, bailarako zein Euskal Herriko beste lekuetatik etorritakoak. Batzuek, besteak beste, baratzeko produktuak, gazta, eztia, ogiak eta gozoak izan dituzte salmentan. Beste batzuek, berriz, eskuz egindako apain, bitxi edota arropak izan dituzte euren postuetan.
Herritar ugari izan da bertan eta giro ederra sortu da plazan. Gainera, mokadutxo baterako aukera ere izan dute herritarrek, talo postua baitzegoen.