Filipinetako selekzioarekin parte hartu du John Cabang irurarrak Asiako Txapelketan, eta domina lortzeko zorian izan da. Bangkoken (Thailandia) aritu da lehiatzen eta gaur izan du 110 metro hesietako finala. Bere marka onena egin du Realeko atletak, baina ezin izan du podiumera igo. 13,56ko marka egin du Cabangek eta horrekin Euskadiko marka berria ezarri du, baina bost milaren azkarrago izan da aurkaria. Helmugako argazkiak erakutsi duenez, Cabangek 13,556 egin du eta azkenean hirugarren izan den Yaqoub Alyouha kuwaitarrak 13,551 egin du.
Lasterketan lehenengo postua Shunya Takayma japoniarrak lortu du, 13,29 eginez, eta bigarrena Xu Zhuoyi txinatarrak, 13,39ko markarekin.