Irurako EH Bilduk datorren maiatzaren 28an izango diren udal hauteskundeetarako zerrenda aurkeztu du. “Esperientzia handiko taldea da, esparru anitzetan eskarmentua duena, ilusioz datorrena eta Irura hobea izaten jarraitzeko lana egiteko gogotsu dagoena”. Gorka Murua buru izango duen zerrenda honetan, aurreko legealdian aritutako hautetsiak eta "freskotasuna eta ilusioa" ekarriko duen jendea ere badago. “Eskarmentua, ilusioa eta freskotasuna” uztartu nahi izan ditu Irurako EH Bilduk, irurarrez osatutako zerrenda honetan: “talde sendoa eta esperientziaduna osatu dugu”.
Hauek dira zerrenda osatuko dutenak: Gorka Murua, Olaia Nieto, Mikel Iturbe, Idoia Garaialde, Noelia Lataburu, Ioritz Lazkano, Aitzol Saez, Begoña Oteiza, Hasier De Los Rios, Maialen Azkue, Mikel Martinez, Iñigo Artola.
Maiatzak 12, aurkezpen ekitaldia
Herritarren aurrean zerrenda aurkezteko, ekitaldi berezia antolatu du Irurako EH Bilduk. Maiatzaren 12an, ostiralean, egingo dute aipatu aurkezpena, herriko plazan, 19:00tan. "Bertan, musika, dantza eta jan-edana ez dira faltako", esan dute. Irurako EH Bildutik herritar guztiak gonbidatu nahi dituzte bertara gerturatu daitezen, “datozen lau urteetarako Irurarentzat zer eskaintzen dugun guztiokin partekatu” nahi dutelako.