2020eko udazkenean egindako hiru udal eraikinen inguruko partaidetza prozesuan horrela erabakita, haur eskolako lehenengo solairuan erabilera anitzeko espazioa eta elkarteentzako bilgune berria eraiki dute. Lanek 136.071 euroko kostua izan dute eta Gipuzkoako Foru Aldundiaren Kultura, Lankidetza, Gazteria eta Kirol departamentuaren 54.429 euroko laguntza jaso du.
Espazioaren diseinuak hainbat erabilera ahalbidetuko du. Horrekin batera, zenbait kirol praktikatzeko gune egokia izango da, hala nola, yoga edota mindfulness-a, isiltasuna eta lasaitasuna bermatzen dituelako guneak.
Irurako Udalak aipatu duenez, herrian lanean diharduten elkarteen arteko elkarlana sustatzea eta bultzatzea da euren ardura eta elkarte hauentzat bilgune izango den espazio berria eraiki dute horretarako, haur eskola gaineko solairuan. «Beraien jardunerako beharrezkoa den laguntza ematea ezinbestekoa da guretzat, izan baliabide ekonomiko zein materialak», esan dute udal ordezkariek, eta nabarmendu dute, herriko eragileekin partekatzen duten helburu nagusia herria bizirik mantentzea dela, «bakoitza bere autonomiatik, baina norabide berean».
Zentzu horretan, udal ordezkarien esanetan, «begi-bistakoa» da herrigintzaren arloan kultura dela herriko zutabe nagusienetakoa. «Iruran lanean diharduten elkarteei esker, gero eta handiagoa eta anitzagoa da kultur eskaintza. Guztien arteko elkarlana sustatzeko jarri zen martxan, hain zuzen, Kultur Mahaia».