Nerabeen errealitate digitala aztertu eta erabilera ohiturak, bizipenak eta arriskuak ezagutzeko hitzaldia antolatu dute Iruran martxoaren 14an, 18:00etan herri eskolako aretoan. Erabilera segurua bermatzeko bitartekaritza estrategiak barneratu ahal izango dituzte bertaratutakoek. 10 eta 14 urte bitarteko haur eta nerabeen gurasoentzat izango da hitzaldia eta euskaraz emango dute.
Saio honetan besteak beste, nerabe hiperkonektatuaren errealitate digitala aztertuko da; horrekin batera, online egotearen arriskuak aipatuko dituzte, hala nola ziberbullying-a, sexting-a, grooming-a, eduki ezegokiak eta gehiegizko erabilera. Interneten erabilera arduratsua sustatuko da eta familien bitartekaritza estrategiak landuko dira.
Gipuzkoako Foru Aldundiak bideratzen duen Treba Gurasoak ekimenaren barruan kokatzen da hitzaldia eta Rakel Gamitok eskainiko du. Gazteria Zuzendaritzak gurasotasun positiboan oinarritutako eskaintza pedagogikoa osatu du eta programa honen bitartez, haurren eta nerabeen heziketa prozesuan lagunduko dieten gaiei buruzko hainbat hitzaldi eta tailer eskainiko dizkie gurasoei. Iruran haurren, nerabeen eta Internetaren arteko harremana ulertzeko saioa izango da lehendabizikoa.