Irurako Udalak, eraikinen eta espazio publikoen energia elektrikoaren kontsumoa murrizteko, eraginkortasun energetiko handiagoa lortzeko eta kostu ekonomikoa gutxitzeko, barruko argiztapena aldatu eta LED lanparak dituzten proiektoreak jarri ditu frontoian.
Lehengo argiteriaren ezaugarriak eta orain jarri berri direnak alderatu ditu udalak taula batean. Aurrezte portzentajea %55,61ekoa dela jakinarazi du eta kalkulatu du baita ere urteko kontsumoa eurotan. Lehengo argiteriarekin urtean 3.481 euro ordaintzen zituzten, eta orain berriz, 1.546 euro.
Taulan agertzen diren datuez gain, aldaketa hauek urtean 2.660kg CO2 gutxiago isurtzea suposatuko dutela esan du Irurako Udalak. Trinketean egin diren beste aldaketa batzuekin batera, trantsizio energetikoaren bidean beste urrats bat gehiago da: "Irura herri jasangarriagoa bihurtu dadin, energia kontsumoaren azterketak ipiniko dira martxan eta norabide berean doazen neurriak hartuko dira hurrengo hilabeteetan".