Batetik, 2022ko egutegiko sari banaketa egin zen, eta bestetik, mendi-erronkakoa.
Egutegirako 24 lagunek aurkeztu zituzten argazkiak, eta guztira, 64 argazki jaso ziren. Hilabete bakoitzeko argazki bat aukeratzeaz gain, epaimahaiak azalerako 3 argazki hautatu ditu. Ondoren, herritarrek aukeratu ahal izan dute egutegiko azala, bozketa bidez. Guztira, 110 lagunek hartu dute parte bozketan, eta Matixa Oruesagastiren argazkia izan da bozkatuena. Hortaz, 12 argazkien eta azaleko argazkien egileek 30€ko bono bana jaso dute Irurako denda edo taberna batean gastatzeko. Halaber, 110 bozkatzaileen artean ere, zozketa egin da eta Idoia Garaialdek irabazi du parte hartzearen saria. Honek ere 30€ko bono bat irabazi du.
Horretaz aparte, I. Irura Bizi mendi erronka izan dute martxan urrian eta azaroan. 14 urtetik gorakoek, Tolosaldeko 5 mendi zehatz egin eta argazkia bidali behar zuten. Heldu batek lortu du erronka gainditzea; Oneka Blancok, hain zuzen ere. Aldiz, 14 urtetik beherakoek, 3 mendi egin behar zituzten, eta 4 lagunek hartu dute parte. Irabazlea Oier Garmendia izan da. Mendi-erronkako sarituek 50€ko bono bana jaso dute Villanonako kirol denda batean gastatzeko.