GI-3650 errepidearen egoeraz hitz egiteko Gipuzkoako Foru Aldundiarekin bildu da udala

Tolosaldeko Ataria 2021ko aza. 22a, 11:20

Irurako Udalak hilabeteotan landu duen txostena helarazi dio Bide Azpiegituretako departamenduari; Aldundiko ordezkariek proposamenak aztertzeko konpromisoa hartu dute.

Azaroaren 11n, Irurako Udaleko ordezkaritza bat (alkatea eta teknikariak) Gipuzkoako Foru Aldundiko Bide Azpiegituretako departamentura hurbildu zen, sail horretako arduradun diren Aintzane Oiarbide foru diputatuarekin, zuzendari eta teknikariekin elkartzera, Irurako Kale Nagusia zeharkatzen duen GI-3650 errepideko trafikoarekin dituen arazoei buruz hitz egiteko.

Irurako Udalak, GEA21 enpresaren laguntzarekin, hilabeteak pasa ditu gaiaren alor nagusiak jasotzen dituen txosten bat osatzen. Bertan, modu zehatz batean aurkitu daitezke egoeraren diagnostikoa, herritarren pertzepzioaren inguruko datuak eta konponbiderako proposamenak.

Bileraren helburu nagusia aurkezpena egitea izan zela esan dute udaleko iturriek, "elkarlanerako lehenengo pauso izan dadin". Trafikoak Irurako herritarren egunerokoa baldintzatzen duela "begi-bistakoa" da udaleko ordezkarien esanetan; "orain, etorkizunera begira, hamarkadatan iraun duen arazoari irtenbideak aurkitzea dagokigu guztioi".

Gipuzkoako Foru Aldundiko ordezkariek konpromisoa agertu zuten Irurako Udalak aurkeztutako proposamenak aztertzeko eta departamentuko teknikarien bidez analisi propioak egiteko.

Ez diogu hau kapritxo hutsagatik: lagun gaitzazu . Eduki hau guztia doan ikus dezakezu euskarazko hitzik gabeko Tolosaldea ez dugulako irudikatzen. Atarikide, iragarle eta erakunde askoren laguntzarik gabe ez litzateke posible hori. Gero eta komunitate handiagoa sortu, orduan eta sendoagoa izango da Ataria: zurekin, zuekin. Ez utzi biharko gaur egin dezakezun hori: egin zaitez Atarikide!


EGIN ATARIKIDE!