Errituak erritu, dena aldakor dago egunotan. Iruran berde koloreak eztanda egin behar zuen garaiotan, ekitaldi sinbolikoarekin konformatu behar izan dira gaurkoan. Gazteenek dantzaz gozatzeko aukera izan dute. Dantza sokan 40 gaztetik gora aritu dira, hiru ordu laurden luzez, San Migel elizako erlojuak ordu bata markatu eta orduantxe.
Plazara, dantzara atera aurretik ordea, erritu berria bete behar izan dute Irurako gazteek: gel hidroalkoholikoarekin eskuak garbitzea, elkarri eskua eman ahal izateko. Dantzarako soinean eraman izan dituzten jantziei, berria ere gehitu zaio gaur, ohiko uniformeari: maskara berdea, San Migel festetako zapi berdearekin ondo ezkonduz.
Eta bi elementu horiek, gela eta maskarak, ahaztuta, une batez, festaz gozatzeko aukera izan da San Migel plazan jarritako aulkietatik. Festa usaindu da, eguzkipean gazteak jo eta fuego dantzan aritu dira eta omenaldiak ere ez dira falta izan. Txistu, dultzaina, danbolin, trikitixa eta pandero hotsei jarraiki, irurarrek oinak astindu dituzte soka dantzaren aitzakian.