Trafikoaren inguruan egin den lanketari buruzko erakusketa jarri dute

Bi astez egongo da ikusgai San Migel plazan, udaletxe atarian. Uztailaren 16an eta 23an, udal ordezkariak herritarren zalantzak argituko dituzte erakusketa gunean, 10:00etatik 11:00etara.

GI-3650 errepideko trafikoa lasaitzeko arazoaz hitz egiteko herri batzarra egin zuen Irurako Udalak ekainaren 22an. Bertan aurkeztu zen Gea21 enpresak gaiaren inguruan egin duen txostena eta orain lanketa horren puntu nagusiak jarri dituzte ikusgai udaletxe atarian dagoen erakusketan.

Besteak beste, Irurako trafikoaren inguruko datuak bildu dituzte eta ibilgailu kopurua, sortzen den zarata eta gertatu diren istripuen ingurukoak jaso dira paneletan. Trafikoa gutxitzeko proposamenak ere landu dituzte, eta adibidez, autobidearekin lotura egiteko dauden aukera ezberdinak aztertu. Herriko eragileen artean banatu den galdetegiaren emaitzak ere kontsultatu daitezke erakusketan.

Datozen bi ostiraletan, uztailaren 16an eta 23an, 10:00etatik 11:00etara udal ordezkariek herritarren zalantzak argituko dituzte erakusketa gunean bertan. Herritarrek euren ekarpenak egin ahal izango dizkiote txostenari eta ondoren azken proposamenarekin joko du udalak Gipuzkoako Foru Aldundira.

Irurako Udalaren webgunean irakurri daiteke Gea21 enpresak landu duen txosten osoa.

 

 

Albiste hau ATARIKIDEei esker argitaratu dezakegu. Haiei esker Tolosaldeko albisteak libre, euskaraz eta kalitatez irakurtzen dituzu. Horrela izaten jarraitzeko eman babesa Tolosaldeko Atariari eta ZU ERE IZAN ZAITEZ ATARIKIDE.

#EgitenDuzunaGara


EGIN ATARIKIDE!