Gaur egun Irurako etxe eta saltokietan sortzen diren hiri hondakinak bildu eta tratatzeko zerbitzuagatik urtean 260.000 euro ordaintzen ditu udalak. Kopuru horri hondakinen garraioari eta tratamenduari lotuta eragiten den kutsadura gehitu behar zaiola uste du udalak. Horregatik herritarrak hondakin organikoak konpostatzera animatu nahi ditu.
Irurako Udalak emandako datuen arabera herriko etxeetan sortzen den hondakinen gehiengoa, %23, organikoa da. "Hondakin klase hori herrian bertan konpostatzen badugu, kamioietan plantara bidaltzea ekiditeaz gain, herriko lurrentzat ongarria lortzen dugu", esan dute udal ordezkariek.
2013an etxeko konpostagailuak banatu zituen eta auzoko konpostagailuak eraiki zituen. "Urte asko pasa dira ordutik, eta konpostajearen ohitura berpizteko eta herritar ororengana zabaltzeko deialdi berria egin nahi dugu", aipatu dute udaletik. Bide batez, gaur egun hondakin organikoa konpostatzen duten herritarrak identifikatu nahi ditiuzte. Irurako Udalak etxeko hondakin organikoak konpostaje bidez kudeatzen duten herritarrak sarituko ditu hondakinen tasan hobaria aplikatuz.
Hondakin organikoak konpostatzen hasi nahi dutenek izen emateko aukera ezberdinak izango dituzte:
- Galdetegia bete eta udaletxeko harreran entregatuz (09:00-14:00).
- Telefonoz udaletxera deituz (09:00-14:00).
- Online (gmail kontu bat izan behar da): https://forms.gle/yBbKuwYTPDfhX83m9
Izen emateko azken eguna ekainaren 11 izango dela jakinarazi du udalak.