Aspaldiko kezka dute Iruran trafiko dentsitatearekin eta iaz egindako neurketa baten arabera egunero 6.000 autok zeharkatzen dute errepidea, askok behar baino abiadura handiagoan. Gaur egun 40 kilometroko orduko abiadura da muga errepide horretan, baina aurki legedia aldatuko da eta 30 kilometro orduko abiadura hartu ahal izango da gehienez errepide horretan.
Hori dela eta lanketa abiatu zuen aurreko urtean Irurako Udalak. Enpresa batek trafikoaren inguruko neurketa egin zuen eta ateratako ondorioak osatzeko, orain, herritarrekin parte hartze saioak egin asmo dituzte. Galdetegiak banatu ditu udalak herriko hainbat eragileren artean.
Behin diagnostikoa txosten batean jaso ondoren, Irura alderik alde zeharkatzen duen errepidearentzako irtenbide posibleak aztertuko ditu udalak Gipuzkoako Foru Aldundiarekin lankidetzan.