Irurako herritarren espazio beharrak ezagutu eta hiru udal eraikinen erabilera posibleak identifikatu, adostu eta lehenestea dira helburuak parte hartze prozesu honetan. Prozesua berme guztiekin egiten ari denaren jarraipena egiteko funtzioa du udaleko bi ordezkarik eta bi herritarrek osatu duten batzordeak.
Prozesuaren oinarriak jarri ondoren, informazio faseari eman zioten bidea. Aipatutako hiru eraikinetara bisita gidatuak egin zituzten 10 laguneko txandetan eta herritarren artean galdetegia banatu zuten. Honako galderak luzatzen ziren bertan: "Herrian, sumatzen al duzu zerbitzuren bat faltan? Zein ezaugarri bete beharko lituzke zerbitzu hori emateko eraikin edo espazioak?". Urriaren 16an amaitu zen galdetegia entregatzeko epea.
Orain, hirugarren fasean, gogoeta fasean murgildu dira Iruran. Bi saio aurreikusi dituzte eta lehenengoa azaroaren 2an egingo dute 17:00etatik 19:00etara. Aurrez izena eman behar da, ordea, eta horretarako udaleko webgunean dagoen fitxa bete beharko da. Urriaren 30a da izen emateko azken eguna. Hurrengo gogoeta saioa, azaroaren 16an izango da.