Berriro ere itzuli da goi mailako xarea Irurako Ametsa trinketera. I. San Migel Xare Irekiaren finala jokatu zen larunbatean, festen barruan, eta irabazleak Larronde eta Moncada izan ziren. 40-34 gailendu ziren Driolet eta Etxeverri bikoteari.
Jendetza elkartu zen trinketean partida ikusteko. Hasiera batean Driolet eta Etxeverri jarri ziren aurretik, eta 30. tantora arte 4 eta 5 tanto inguruko tartea ateratzen zien aurkariek. Baina Etxeverriri nekeak eragiten hasi zitzaion eta Larrondek eta Moncadak buelta eman zioten markagailuari. Partidaren azken partea erraz eraman zuten, txapela jantziz.
Ostiralean jokatu ziren finalerdiak eta finalera ez zen pasa irurarrik. Apeztegia irurarrak eta Funosasek galdu egin zuten beren norgehiagoka. Bestalde, Lopetegi irurarra lesionatu egin zen txapelketa hasi aurretik eta ezin izan zuen parte hartu.
Balantze «oso ona» egin dute Ametsa pilota elkartetik, eta datorren urtean bigarrengo txapelketa antolatzeko asmoa erakutsi dute. Irurako Udalari emandako laguntza eskertu diote.
NESKEN PARTIDAK
Finalaren aurretik erakustaldia jokatu zuten Ametsa elkarteko neskek. Xareko partida bateko pilotari guztiak emakumezkoak ziren lehen aldia zen. Hiru bikotek elkarren aurka jokatu zuten. Naroa Goenagak eta Matxalen Mendizabalek jokatutako biak irabazi zituzten. Irati Fernandezek eta Nahia Gorritik partida bat irabazi zuten, eta Nora Galartza eta Maider Isasa garaipenik gabe geratu ziren.
40-34 irabazi zieten Driolet eta Etxeverriri. Finalaren aurretik nesken xare partidak jokatu ziren lehen aldiz.
Ez diogu hau kapritxo hutsagatik: lagun gaitzazu . Eduki hau guztia doan ikus dezakezu euskarazko hitzik gabeko Tolosaldea ez dugulako irudikatzen. Atarikide, iragarle eta erakunde askoren laguntzarik gabe ez litzateke posible hori. Gero eta komunitate handiagoa sortu, orduan eta sendoagoa izango da Ataria: zurekin, zuekin. Ez utzi biharko gaur egin dezakezun hori: egin zaitez Atarikide!
EGIN ATARIKIDE!