Jon Ander Cabero ibartarra eta Laiane Arrospide tolosarrak irabazi dute Irurako VIII. Kros herrikoia. Bigarren sailkatu dira Xabier Agirrezabala zizurkildarra eta Maria Pilar Esnaola ibartarra. Hirugarren postua, berriz, Irurako Mikel Gabirondorentzat eta Berrobiko Iosune Alberdirentzat izan da.
Helduen lasterketan, guztira 45 korrikalarik parte hartu dute, senior eta beterano kategorietan banatuta. Irurako kirol astearen barruan antolatu dute krosa eta parte hartzaileek 5145 metroko ibilbidea egin behar izan dute. Bukaeran, sari banaketekin batera, zozketa ere egin dute.
Txikienek ere eduki dute aukera korrika egiteko. Izan ere, hainbat lasterketa egon dira hauentzat ere, adinaren arabera banatuta. Hain zuzen ere, aurrebenjaminen bi lasterketa egon dira eta benjaminen, alebinen eta infantilen bana.