Irurako Kirol Astea egingo dute, martxoaren 30etik apirilaren 14ra bitarte, eta datorren astebururako hitzordu nagusia Irurako V. Patin Lasterketa Herrikoia izango da; igandean, Katategi industriagunean egingo dute. Irristaka taldea ari da antolatzaile lanetan, eta bertako kide da Iñaki Urkizar: «Urtean zehar egiten ditugu aisialdi giroan jarduerak, baina, igandeko lasterketekin, aldarrikatu nahi dugu patinajea kirola dela».
Ekitaldia 11:30ean hasiko da, eta lau proba izango ditu. Lehenengoan Gipuzkoako Txapelketa jokatuko dute alebin, infantil, jubenil eta juniorretan, neska zein mutiletan. 2,5 kilometro egingo dituzte, eta 20 parte hartzaile inguru ariko dira, denak batera.
Bigarrengo proba 6 eta 9 urte artekoentzat izango da, 500 metroko ibilbidearekin. Hirugarrena 10 eta 15 urte artekoentzat, 1,7 kilometrorekin. Bi proba horietan ez da sailkapenik izango. Laugarren proba helduentzat izango da, 8,5 kilometrokoa, eta hor sailkapena izango da. «Bai Gipuzkoako Txapelketarekin, bai helduen lasterketarekin, erakutsi nahi dugu patinajea kirol bat dela, lehiatu egiten dela, oso bizia dela, oso ikusgarria eta, aldi berean, gogorra», esan du Urkizarrek. Helduen mailan, lehenengoak 30 km/h-ko abiaduran ibiliko direla gaineratu du.
Proba guztiak kontuan hartuta, 200 parte hartzaile inguru espero dituzte iganderako. Izena eman nahi duenak aukera izango du, igandean bertan, 11:00ak baino lehen.
IRURAKO KIROL ASTEAREN EGITARAUA
Martxoak 30, larunbata
Irteera Gaztelekutik, Donosti Bubble Football-era.
Martxoak 31, igandea
11:30. Irurako V. Patin Lasterketak. Katategi industrialdean.
Apirilak 1, astelehena
17:00. Haurrentzat herri jolasak plazan. Ondoren merienda parte hartzaileentzat.
Apirilak 4, osteguna
17:00. Eguzki Txokotik nagusien irteera.
Apirilak 5, ostirala
17:00. Kirol saltsa frontoian LH3 eta LH6 bitarteko haurrentzat. Izen ematea apirilaren 1a arte kultura bulegoan. Ondoren, Ametsa Xare Eskolako txapelketen finalerdiak.
Apirilak 6, larunbata
Orientazio proba familientzat eta lagunentzat, arratsaldean.
Apirilak 7, igandea
11:00. Bailarako VIII. Kros Herrikoia.
2 urtetik 14 urte bitartekoak hasiko dira. 12:00etan, helduen eta beteranoen txanda izango da.