Naroa Lasa Irurako Gazte Asanbladako kideak adierazi duenez, "herria eta batez ere herritarrak mugiarazteko zerbait antolatzea ondo egongo litzatekeela pentsatu genuen, udaran egin ohi den gazte eguna gutxi iruditzen zitzaigulako". Gabonetan, elkarteak antolatutako babarrun jana egin zuten, eta bertan hasi ziren gaurko egunerako ideiak botatzen, bazkari herrikoi bat egitearen beharra ikusi baitzuten.
Hala ere, goizean, eguna ondo hasi, aldi berean, egitaraua betetzeko, ekintza bat prestatu nahi zuten. Hori dela eta, zumba saioa egin dute, Nora Iñurrita herritarrak gidatutakoa. Kantu desberdinak hartuz, koreografia ugari dantzatu dituzte herritarrek. Hasieran dozena bat ziren, baina jende gehiago batu da gero.
Behin plazako zumba saioa amaituta, 14:00etan, bazkaria egingo dute frontoian. Aurten, gainera, helduentzat eta haurrentzat menu desberdinak egongo dira. Ondoren, berriz, kantaldia Joxe Mendizabalen eskutik. "Herritarra izanda, berari proposatzea erabaki genuen". Azkenik, eta egunari amaiera emateko, 18:00etan, poteo musikatua egingo dute, herriko tabernetan.