38 urteko gizonezko bat atxilotu zuen atzo iluntzean Ertzaintzak, Iruran, azkenaldian herrian eragindako hainbat suteren harira. Segurtasun Sailak jakitera eman duenez, ohiko delitugilea da, eta aurrez beste hamar aldiz atxilotu izan du poliziak.
Urriaren erdialdean hasi zen Ertzaintza salaketak jasotzen. Orduan, Laskibar eta Ibai-Ondo industriaguneetako edukiontziak erre zituen. Edukiontziez gain, furgoneta bati su eman zion, eta su horrek beste auto bat ere kaltetu zuen. Egun batzuk beranduago, txabola bat eta negutegi bat erre zituzten, eta hilabete beranduago leku berean beste sute bat eragin zuen. Azaroaren hasieran, berriz, hormigoizko egitura bati eman zion su, baita Laskibar inguruan aparkatuta zegoen autokarabana baten karga eramateko egitura ere. 15.000 eurotik gorako kalteak eragin dituela jakinarazi du Segurtasun Sailak.
Ertzaintzak ordurako ikerketa abiatua zuen, eta bildutako informazioarekin sute horien egilearen profil bat osatu zuten. Behin informazio hori baieztatu ondoren, atzo atxilotu zuten 38 urteko gizonezkoa. Gaur goizean, berriz, Tolosako guardiako epailearen aurretik pasa da.