Eskolako beste langile eta gurasoen laguntzaz, Irurako ikastolako ikasleek uraren gaia landu dute aurten Eskola Agenda 21 proiektuaren barruan. Eskolan egin dute lehen lanketa eta ondoren herriaren egoera aztertu dute: Haur Hezkuntzako ikasleak erreka garbi mantentzearen garrantziaz konturatu dira; Lehen Hezkuntzako lehen eta bigarren mailako ikasleek herriko iturriak aztertu dituzte; hirugarren eta laugarren mailako ikasleek herritarren ohiturak aztertu dituzte; eta bosgarren eta seigarren mailakoek ibaiei begiratu diete.
Azterketa egin ondoren, ikasleek zenbait konpromiso hartu dituzte eta udal foroan aurkeztu dituzte udal ordezkarien aurrean. Besteak beste, iturriak ondo zainduko dituztela hitz eman dute eta errekara zaborrik ez dutela botako. Gainera, ur kontsumoa gutxitzeko neurriak hartu eta ura alperrik ez dutelako gastatuko esan dute.
Herriko iturrien ur emaria kontrolatu eta iturri horietako batzuk egokitzeko eskaera ere luzatu dute ikasleek udaletxean. Ana Leunda alkateak aukera baliatu du herriko ondare diren iturri horien historia gogoratzeko: «1888. urtean hil ondoren Josefa Ignacia Arreseigorrek diru kopuru bat utzi zuen Villabonako Iturtxulotik ura Irurara ekartzeko. Horrekin batera hiru iturri egiteko dirua eman zuen: egun udaletxea atzean dagoena, Etxezarretakoa eta garbitokia».