Gipuzkoako Foru Aldundiak eta Irurako Udalak hitzarmena sinatu dute. Errepidea berritzeko lanak 284.269 euroko aurrekontua du eta udalak proiektuaren lanak kontratatu eta gauzatzeko konpromisoa hartu du. Aldundiak, bere aldetik, bere eskumenekoak diren obrak finantzatuko ditu, 119.786 eurorekin.
"Herriko segurtasuna eta zerbitzuak hobetzeko lanak" izango dira, Ana Leunda alkateak nabarmendu duenez. GI-3650 errepidearen zeharbidean, Kale Nagusia 25 eta 29 arteko zatia hiritartzeko proiektuari dagokion hitzarmena onetsi dute bi erakundeek.
Erdiko irlatxoa kendu, oinezkoen segurtasuna hobetzeko espaloia zabaldu eta drainatze sarea berritu. Horiek dira aurreikusten diren lanak. Horrekin batera, argindar, telekomunikazio, gas, argiztatze publiko, saneamendu eta horniketa sareak eta galtzadaren zorua berrituko dira.
Aintzane Oiarbide, Bide Azpiegituretarako diputatuak aipatu duenez, "puntu jakin batean sestra aldatuko da, egun N-1 errepideko irteeran sortzen den putzua desagerrarazteko, izan ere, ibaia hazita datorrenean Oriako ubidera ura drainatzeko arazoak izaten dira".