Segurtasun kamerak plazan

Gaur egun bi sarbide ditu Irurako plazak. Udaletxearen atzealdekoa mugatua da. Pibota baten bitartez erregulatzen dute trafikoa. Lanegunetan itxita egoten da 8:30etatik 12:30etara eta 14:00etatik 20:00etara. Ordutegi horretan baimendutako bizilagunek bakarrik dute sartzeko eskubidea, horretarako eman zaien txartelaz baliatuta. Larunbatetan, 13:00etatik 20:00etara eta igande eta jaiegunetan 8:30etatik 20:00etara ixten dute sarbidea. «Baimena eskatuz gero, pibotaren ondoan dagoen txirrina jo eta plazara sartzeko pasoa eman dezakete bulegotik egoki ikusten bada». Horrela adierazi du Joxi Lasa herriko langileak.

Plazara sartzeko bigarren sarbidea Enara tabernaren ondoan dago. Bide hau aukeratzen dutenek, ordea, ezingo dute plazaraino sartu, elizaren atzeko gunera bakarrik iritsi ahal izango dira.

Herriko bi puntu horietan jarri ditu kamerak Irurako Udalak. Neurri hauek hartu zirenetik istripu batzuk ere gertatu dira. «Zenbait ibilgailuk pibotaren kontra jo dute nahigabe eta kalteak eragin dituzte». Bestalde, sumatu dute gidari askok ez dituztela trafiko arauak errespetatzen: «Enara ondoko bidetik sartu eta kontrako noranzkoan sartzen dira plaza barruraino».

Jarri diren bi kamerekin irregulartasun horiek kontrolatuko dira eta aipatu dutenez, «dagoeneko martxoa hasieratik hasita gaude lehen isunak bidaltzen». Trafikoa kontrolatu eta sarrerak zerrendatzeko ere balioko dute kamerek.

Irurako Agenda 21aren barruan markatutako helburuei erantzuten diete neurri hauek. Joxi Lasaren esanetan «segurtasun irizpideak bete behar ditugu, herriko plazan haur asko ibiltzen baita. Gurasoak askotan ume bila kotxez etortzen dira eta ohitura horiek aldatu nahi ditugu, ahal den neurrian».

Irurako erdigunean distantziak motzak dira. Udalak oinez ibiltzeko ohitura sustatu nahi du herritarren artean.