Eguberriak gerturatzearekin batera saltokiek kanpaina bereziak egiten dituzte herritarrak kontsumitzera animatzeko, eta Iruran ere ez dute huts egin. Aurtengoan ere Gabonetarako kanpaina prestatu dute irurarrak herrian bertan kontsumitzera animatzeko.
Ekainean abiarazitako «Egin Irura, kontsumitu herrian» kanpainarekin jarraituz, herrian kontsumituz, Irura egiten jarraituko dute Eguberrietan ere. Ainhoa Ugalde alkateak eman du kanpainaren berri: «Garrantzitsua da herrian bertan erostea, eta hori sustatzeko herriko zozketak antolatu ditugu».
Bi dira egingo dituzten zozketak. Batetik, erosketa txartelak banatuko dituzte, eta bestetik, bi lagunentzako hiru asteburu pasa ere badituzte banatzeko.
Erosketak herriko saltokietan egiteagatik datuekin bete beharreko txartela banatuko dute eta horrela hartu ahal izango da parte zozketetan, gaurtik aurrera.
25 euroko hiru erosketa txartelak abenduaren 23an zozkatuko dituzte. Saltoki bakoitzak egingo du zozketa. Abenduaren 24an berriz, Olentzeroren etorrerarekin batera egingo dute hiru asteburu pasen zozketa plazan bertan.