Kiroldegian egin litezkeen aldaketak lantzeko bilera irekia egingo dute maiatzaren 14an, Ikaztegietako udaletxean. Martxoaren 24an eta 25ean izan zituzten parte-hartze prozesuaren saioak eta herritarrek kiroldegiaren inguruko proposamenak eta beharrak zehaztu zituzten eta Juntura kooperatibakoek jaso zituzten.
Saio horietan jasotakotik tiraka proposamen bat prestatu dute eta herritarrei aurkeztuko diete hilaren 14an. Eta, hain zuzen, hori izango da herritarrek prozesuan parte hartzeko izango duten bigarren —eta azken— aukera: kiroldegian egin litezkeen aldaketen berri emango dute, eta herritarrek iritzia eman ahal izango dute. Ekarpen horiek kontuan hartuz aldaketak egin beharko balituzte egiten duten proposamenean, bigarren saio bat egingo lukete egokitzapenen berri emateko.
Herritarrek iritzia emateko azken aukera, beraz, maiatzaren 14an izango da, 17:30ean, udaletxeko lehen solairuko erabilera anitzeko aretoan. Udaletik parte hartzera gonbidatu dituzte herritarrak: «Aprobetxatu momentua: zatoz proposamena ezagutzera eta, ekarpenik izango bazenu, zure iritzia ematera!».