Azken urteetako ohitura jarraituz, Euskal Azoka antolatu du Ikaztegietako Kultura Batzordeak apirilaren 5erako. 10:00etatik 14:00etara denetariko postuek osatuko dute azokako «eskaintza zabala», horien artean, baserriko produktuak, edariak, jakiak, artisautza lanak, jantziak eta liburuak.
Hori gutxi ez, eta postuez gain zenbait tailer ere egingo dituzte, besteak beste, musikari eta dantzari buruz. Azoka eta tailerretatik harago, udaletik adierazi dute kantu-bazkari bat ere egingo dutela segidan.
Boluntario bila
Azoka aurrez antolatzeaz gain, eguna gerturatu ahala beste zenbait egiteko ere izango direla adierazi dute Ikaztegietako Udaletik, eta horiek egiteko boluntarioak behar dituztela: «Aurretik eta ostean muntatze lanak egitea eskatzen du, eta boluntario gisa aritzeko prest daudenei izena emateko aukera eman nahi diegu».
Hori horrela, lagundu nahi dutenek izena eman beharko dute ostirala —martxoaren 28a— baino lehen, udaletxeko 943 65 33 29 telefonora deituta eta zein egunetan lagundu nahi duten adierazi. Bezperako ostiralean, apirilaren 4an, postuentzako karpak muntatu beharko dira, 18:00etan, plazan; eta, larunbatean, azoka egunean, 14:00etan dena jaso beharko da.
Bazkarirako txartelak
Azoka osteko kantu bazkarira joateko beharrezkoa izango da, aurretik, txartelak eskuratzea eta horretarako aukera herriko ostatuan izango da, martxoaren 28a bitarte. Txartelak 25 euroan salduko dituzte, eta egongo dira txerrikirik zein glutenik gabeko aukerak ere.
Bigarren eskuko postua
Aurtengo azokan bigarren eskuko postu bat ere jarriko dute, eta udalak azaldu du nola parte hartu beharko den: truke moduan funtzionatuko du, hau da, norbaitek zerbait hartu nahi izanez gero zerbait utzi beharko du. Dena dela, ezingo dira gauzak utzi bakarrik, horretarako, liburutegi ondoko txokora joan beharko da.