Ikaztegietako Udalak jakinarazi du arriskuan dagoela elikagai bankuko jakien banaketa, boluntariorik ez dutela-eta. Udaletik adierazi dutenez, duela urte batzuk hasi ziren herrian elikagai bankuaren zerbitzua ematen, beharra dutenei hilean behin elikagaiak eskaintzeko.
«Beste herrietan bezalaxe, banaketak boluntario bidez funtzionatu izan du; ez baita hau udalaren konpetentzia. Hala ere, udal langileak dira janaria herrira ekartzen dutenak». Dena dela, momentu honetan boluntariorik ez dutela eta banaketa arriskuan dagoela ere nabarmendu dute. Interesa izan lezakeen edonork izena udaletxean eman lezakeela azaldu dute: «Komunitateari ekarpen bat egiteak herria eta gure bizitza aberasten ditu».
Hilabeteko lehenengo ostiraletan egiten dute banaketa, goizez, eta ordu bete inguru irauten du.