Ikaztegietako Udalak salatu du «gutxienez» bi astetatik hona hondakinak azaltzen ari direla herrian: «Onartezina dena ohiko bihurtzen ari zaigu: badira bi aste gutxienez kalean hildako arrainak bota direla, pipa azalak egoten dira nonahi herrian, garbigunera eramateko zaborra kalean utzita, kimatutako adarrak lekuz kanpo botata, freskagarrien ontziak eta tabako paketeak lurrean…». Eta horren, aurrean, «bizilagunekiko begirunea eta gizalegea» eskatu eta nabarmendu du guztien ardura dela herria «txukun mantentzea».
Hari horri tiraka gogorarazi du organikoa eta errefusa atez ateko sistemaren bidez jasotzen direla; eta ontzi arinak, kristala, papera eta kartoia, berriz, bakoitza bere edukiontzian. Zentzu berean, gaineratu du kiroldegiko gazte lokalaren ondoko gunean bota behar direla adarrak eta hostoak; eta mankomunitatera deitu behar dela beti altzariak, etxetresna elektrikoak eta traste handiak botatzeko.
Horrez gain, zehaztu du ez dela mankomunitateko eta udaleko langileen lana obretako hondakinak, gurpilak, hondakin arriskutsuak eta ebakitzaileak jasotzea; kontrara, horiek zuzenean garbigunera eraman behar direla.
Tonu berean, adierazpena esaldi labur batekin amaitu du: «Hartu dezagun sortzen dugun hondakinaren ardura, mesedez».