Gertakaria atzo arratsaldeko bostak aldean gertatu zen. Ertzaintzaren arabera, Ikaztegietan hainbat lekukok ohartarazi zuten bi pertsonak «jarrera susmagarria» zutela. Antza, batek ingurua zaintzen zuen, beste batek etxe bateko atea manipulatzen zuen bitartean.
Ertzainek, lekukoekin hitz egin ondoren, etxebizitza ikuskatu zuten; baina ustezko lapurrak ez zeuden barruan, eta susmagarrien bila hasi ziren. Handik gutxira, patruilak bi pertsona atxilotu zituen inguruan, zeinak «bat zetozen» lekukoek emandako deskribapenarekin.
Atxilotuek 23 eta 26 urte dituzte, eta ertzain-etxean «beharrezko eginbideak» amaitu ondoren aske utzi zituzten, agintaritza judizialak eskatzen dienean agertzeko betebeharrarekin.