Ikaztegietako Galtzalde kiroldegi barruan, Enara Macicior pilotaria partidan lehiatzeko prest. Eta kiroldegi kanpoan, Asmoz fundazioko Maria Irulegi Pilota Fandom proiektua azaltzeko pronto.
Eusko Ikaskuntzaren Asmoz fundazioak Gipuzkoako Euskal Pilota Federazioarekin elkarlanean gauzatu du Pilota Fandom proiektua. Honela, «artea eta teknologia berriak uztartu dituzte, pilota ikusle gazteekin konektatzeko».
Kromo digitalak sortzeko ardura Ane Zufiaurre Seijo artista gipuzkoarrak izan du. Maria Irulegik bildumaren berri eman du: «Denera 18 kromoko bilduma bat da, eta hiru ardatzetan banatzen da: batetik, pilotarien kromoak daude; bestetik, pilotarien gustuko frontoiak daude; eta azkenik, ardatz abstraktuena legoke, pilotaren baloreak irudikatuz».
Enara Macicior pilotariarekin batera, kromoetako protagonistak izango dira Oier Alkorta, Naroa Agirre, Mikel Mancisidor, Eneritz Lizardi eta Beñat Garmendia.
Kromo digitalak
Kromoak digitalki jarriko dira eskura, NFT gisa erosi ahal izateko, eta laster proiektu beraren webgunea martxan izango da –martxotik aurrera–. Kromoak argitaratu bezain pronto eskuratzeko aukera izateko itxarote zerrenda batean izena eman beharra dago.
