Giro paregabean jokatu zen finaleko itzulera. Harmailak leporaino beteta, eta bi taldeak animatuz. Lehen ordu laurdenean Aizarnazabal jaun eta jabe izan zen, Ikaztegietakoen gainetik pasatuz, eta 15. minuturako 5-1 ari ziren irabazten. Ordurako finala iraulita zuten, eta bazirudien txapela etxean geratuko zela, baina atsedenera joan aurretik kanpokoek buelta eman eta bi gol sartu zituzten, finala berdinduz. Atsedenera 5-3 joan ziren.
Bigarren zatiaren hasieran etxekoek indartsu atera ziren, seigarren gola lortuz, baina Ikaztegietakoek beste gol batekin erantzun zuten, ondoren Xuban Exaberen gol batek 7-4koa jarri zuen. Berriro ere txapela etxean zegoen, baina Mohak kanporaketa berdintzea lortu zuen. Luzapena geroz eta gertuago ikusten zenean, Ruforen jaurtiketa Aizarnazabalgo jokalari batengan jo eta baloia barrura sartu zen, txapela Ikaztegietako bidean jarriz.
Ez zen gehiagorako betarik izan, eta helduen mailako lehenengo Herri Txikietako Txapelketa Ikaztegietara joan zen. «Dena dela, bi partidetan bizi izan den giroa nabarmendu beharra dago, ikaragarria izan baita, txapelketa honek jarraipena behar duela argi eta garbi ikusiz», azaldu dute txapelketaren bultzatzaileek.
Datuak
Aizarnazabal 7 - Kutturru 6
Aizarnazabal: Alvaro, Varela, X. Etxabe, Leon eta D. Etxabe –hasierako bostekoa–, Olaizola, Irizar, Diaz, Villar, Agirre, Alberdi eta O. Etxabe.
Kutturru: Gelbentzu, Aimar Murua, E. Murua, Rufo eta Moha –hasierako bostekoa–, Jauregi, Leunda, Arruabarrena, Escaño, Larrañaga eta Ander Murua.
Epailea: Iñaki Ayerdi. Etxekoen aldetik Varelak ikusi zuen txartel horia, eta kanpotarren aldetik, berriz, Jauregik eta Arruabarrenak.
Golak: Aizarnazabal: X.Etxabe (4), Varela (2) eta O. Etxabe. Kutturru: Rufo (3), Moha (2) eta E. Murua.
Gorabeherak: Leporaino bete zen Aizarnazabalgo Atari Soro pilotalekua. DJak eta bertsolariak alaitu zuten finala. Neurketa hasi aurretik Sagardoaren Txapelketa irabazi berri duen Beñat Segurola erremontistak omenaldia jaso zuen, ohorezko sakea eginez.