Joanekoan Ikaztegietakoek 5-3 irabazi zuten, eta bi goleko alde horri eusten saiatuko dira eta Aizarnazabalgoak alde horri buelta ematen. Joanekoan garbi ikusi zen bi taldeen artean alderik ez dagoela, eta finalak oso irekia izaten jarraitzen du. Etxekoek bi goleko aldearekin irabaziko balute, eta arauzko 50 minutuak amaitutakoan kanporaketan berdinketa balego, 5 minutuko luzapena jokatuko da, eta hor ere golik ez balego penaltietara erabakiko litzateke.
Joanekoan bezalaxe, oraingoan ere festa bat izango da, eta harmailak leporaino beteko dira. Izan ere, Aizarnazabalen arratsalde osorako festa antolatu dute. Pilotaleku zaharrean nesken pala txapelketako finalerdiak jokatuko dira 16:30etik aurrera. Ondoren DJ Olber izango da frontoi berrian, finala jokatuko den lekuan, eta bertan ez da faltako jan eta edatekorik, taberna egongo baita.