Hasiera batean liga bat jokatzeko asmoa baldin bazen ere, bi taldek bakarrik eman dute izena mutiletan (nesketan ez du inork eman), eta zuzenean finala jokatuko dute. Aurreneko aldiz jokatuko da txapelketa hau helduen mailan, baina espero dute datozen urteetan herri txiki gehiagok izena ematea, horrela liga bat sortuz, hori baita asmoa eta nahia.
Partida honek giro bikaina sortu du herrian, eta Ikaztegietako Pako Belea konpartsak ere parte hartuko du. Horretarako, 17.30etan batuko dira herriko plazan, ondoren denak kalejiran pilotalekura joateko. «Aizarnazabaletik ere espero da jendea, eta guztiak batuta giro bikaina espero da harmailetan, neurketa festa bihurtuz. Gainera, jatekorik eta edatekorik ez da faltako, etorkizunean oso txapelketa polita izan behar duenari bultzada emanez», adierazi dute Kutturru taldetik.