Ikaztegietako Udalak azken urtean kiroldegiko zelaian eta inguruan hainbat obra eta aldaketa egin ditu eremua egokituz, eta kiroldegiaren horma zatia pintatuz eman nahi izan dio eremuari amaiera. Udalak eskolari egin zion margotzeko proposamena, eta irakasleek erronka onartu zuten.
Lehenik eta behin eremua neurtu, marraztu beharrekoa erabaki eta horman marraztu zuten. Gero etorri zen ikasleen lana. Egun eta txanda ezberdinetan lanak banatuta, guztien artean margotu dute. Udalak jarri du beharrezko materiala, eta haurrek jarri diote eremuari kolorea. Paretak zikin eta triste zeudela dio udalak, eta gustura geratu dira emaitzarekin.